A nosa metodoloxía

Como traballamos?

PEDAGOXÍA ITINERANTE

Esta metodoloxía que nos é propia baséase na aprendizaxe en contexto. Isto é, aproveitar as oportunidades e posibilidades educativas que a vida real nos ofrece. Implica aprender as letras lendo a cartelería dos comercios da aldea; implica entender o ciclo da vida recollendo os tomates da horta; implica aprender historia conversando coas mulleres maiores que están ao redor.

Pedagoxía itinerante é acudir a aqueles lugares onde o aprender xorde de maneira natural. A nosa aula é o propio mundo.

EDUCACIÓN ARTESANAL

Artesanía (subs. fem.): Técnica ou arte do artesán, que ten como finalidade a elaboración de produtos dun xeito manual utilizando medios e métodos de produción tradicionais.

Por que artesanal?

Porque é sostible, non se pode producir en masa, hai unidades limitadas que lle dan un valor incalculable.
Porque está deseñada con agarimo e coidado.
Porque está feita a lume lento, vai paseniño.
Porque se fai coas mans e para as mans.
Porque cada proposta é única, diferente e moi pensada.
Porque coida da tradición e promove o seu perdurar.
Porque mira polas persoas e pola Nosa Terra.

Estamos aquí para acompañarte se buscas un novo xeito de educar.

Os nosos servizos

Se chegaches ata aquí quizais estás pensando «Soa ben, pero que é isto realmente?»

Escola infantil
(2-6 anos)

Estamos a poñer en marcha unha pequena escola infantil na contorna rural. É un lugar onde comezaremos o día cun paseo pola natureza, onde prepararemos o almorzo xuntas arredor do lume, onde crearemos coas nosas mans.

Teremos un horario amplo e flexible para adaptarnos ás necesidades de cada familia. Faremos, por tanto, horarios personalizados.

Apoio socioeducativo

Organizamos sesións de apoio educativo dende unha perspectiva transversal, favorecendo a aprendizaxe competencial, pero a de verdade. Xogamos e desenvolvemos pequenos proxectos que teñen repercusión na contorna, indo moito máis aló do papel.

Imaxinades aprender lingua ou matemáticas desenvolvendo unha pequena reforma na aldea?

Obradoiros e programas

Organizamos actividades máis puntuais para a aprendizaxe e o desfrute das crianzas ou para particicipar en familia, en comunidade.

Igualmente, contamos con outros programas educativos que se manteñen estables dentro do noso proxecto, eses onde o noso soño de vai tornando realidade de vagariño. Tamén temos a opción de facer talleres en centros educativos.

Ocio e conciliación familiar

Convertémonos nun lugar do que se pode formar parte de xeito puntual, tendo a certeza de que o tempo se converterá nunha enorme oportunidade de aprendizaxe e desfrute na contorna rural e natural, coa riqueza que isto implica.

Non importa o tempo que sexa, mesmo cando vaiades facer recados.

Formación a profesionais

Non hai calidade educativa sen actualización constante. Ofrecemos a posibilidade de formar profesionais na metodoloxía que nos é propia: a pedagoxía itinerante.

Asemade, organizamos visitas pedagóxicas para docentes e profesionais do terceiro sector co gallo de ver e aprender do que facemos in situ. Así, contextualizamos aquilo do que falamos.

Asesoramento a familias

Se procurades unha nova forma de acompañar a aprendizaxe das crianzas temos a opción de desenvolver asesoramentos personalizamos.

Organizamos encontros regulares para analizar as necesidades e características de cada familia de cara a deseñar unha intervención conxunta e establecemos canles de comunicación continua.